Isa 19 | ZomZIV | STEP | Egypt tawh kisai thusuak: En in, Egypt lam manawhin a manlang meii tungah TOPA hong tuang hi. Ama mai-ah Egypt milimte ling uh a, Egypt-te lungsim a beimang hi.

Isaiah 19

Egypt’ Thu Genkholhna

1 Egypt tawh kisai thusuak: ^a

En in, Egypt lam manawhin
a manlang meii tungah TOPA hong tuang hi. ^b
Ama mai-ah Egypt milimte ling uh a,
Egypt-te lungsim a beimang hi. ^c
2 “Egypt-te do dingin Egypt-te mah kilok ding uh a -
a sanggampa in a sanggampa do-in, ^d
a vengpa in a vengpa do dinga;
khuapi in khuapi do-in,
kumpi-gam in kumpi-gam mah a do ding hi.
3 Egypt-te a lungsim uh bei dinga,
amaute ngimna a mawkna ka suaksak ding hi; ^e
amaute in milimte le misite’ kha,
vankahte le aisante thu a dong ding uh hi. ^f
4 A kheltat topa khut sungah
Egypt mite ka pia dinga,
a kihtakhuai kumpi khat in amaute a uk ding hi,” ^g
Topa, Thahatpen TOPA in cikhia hi.
5 Guntuite kang dinga, ^h
gun nuai hulin a keugaw ding hi.
6 Hawkguamte namsia dinga ⁱ
Egypt gama luite kiamkiamin a keucip ding hi. ^j
Pumpengte le phaite vulgawpin gunpiau a om,
7 Nile gun dunga singnote zong
a vulgawp ding hi. ^k
Nile gun dunga lo kipawi peuhmah keugaw dinga,
huih in lenmangin a om nawn kei ding hi.
8 Ngasa bengte thumin taamlo ding uh a, ^l
Nile sunga ngathang siahte khempeuh, ^m
tuitunga lenkhakte
a thanem khin ding uh hi.
9 Anthul khauhual nasemte lungkia ding uh a,
saihadial puan hoih gante a lametna uh a bei ding hi. ⁿ
10 Puan tawh kisai nasem peuhmah lungneu ding uh a,
sum thalawh khempeuh a lungsim uh a na ding hi.
11 Zion uliante bangmah man loin hai uh a,
Pharaoh thulak mipilte in a kimanna om lo thu a lak uh hi. ^o
Bangci in Pharoah tungah,
“Kei mipil khat ka hi a,
tanglai kumpite nungzui khat ka hi hi,” ci thei na hi hiam?
12 Tu-in na mipilte koi-ah om uh hiam? ^p
Thahatpen TOPA in
Egypt tunga a tunsak dinga
a ngimna kilaksak dih in.
13 Zoan uliante mihai suakta uh hi.
Memphis ^{▼▼19.13 Hebrew in Noph} makaite kikhem hi; ^r
Egypt innkiu suangte in
a mite uh lam khialhpih khin uh hi.
14 TOPA in amaute tungah lung-apna kha buak a; ^s
zukhampa a luak lakah a hoi daidai bangin
amaute in a sepnasa khempeuh ah
Egypt a hoisak daidai uh hi.
15 Egypt in a lu ahikeh a mei, nisuh hiang ahikeh pumpeng -
bangmah a cih thei kei hi. ^t

16 Tua ni ciangin Egypt mite numei tawh a kibang ding uh hi. Thahatpen TOPA in amaute langah a khut viikin a laptohna hangin lau-in a ling ding uh hi. 17 Tuateh Judah gam in Egypt mite lausak dinga, amaute langa Thahatpen TOPA geelna hangin Judah mi a kici peuhmah a kihta ding uh hi. ^u

18 Tua ni ciangin Egypt khuapi ngate in Canaan kam zang ding uh a, Thahatpen TOPA tung kiciamin thu a ciam ding uh hi. Tuate lakah khat Kisiatna Khuapi ^{▼▼19.18 Masoretic Bupi khutgelh khempeuh; Masoretic khutgelh pawlkhat, Si Tuipi Laizialte le Vulgate ah Ni Khuapi (tua in Heliopolis)} kici ding hi.

19 Tua ni ciangin Egypt laizang ah TOPA tungah biakna-tau khat om dinga a gamgi ah TOPA tunga suangphuh khat a kiphut ding hi. 20 Tua in Egypt gam sungah Thahatpen TOPA tunga lim le teci hi ding hi. Amaute a nengniamte hangin TOPA tungah a kiko uh ciangin amah in amaute honpa khat puakin hu dinga, amaute a suaktasak ding hi. 21 Tua ciangin Egypt mite tungah TOPA kilak dinga tua ni ciangin amaute in TOPA a telcian ta ding uh hi. Amaute in biakpiakna le an-a biakna in bia ding uh a; TOPA tungah kiciamin a kiciamna uh a tangtun ding uh hi. 22 TOPA in pulpi tawh Egypt vat dinga, amaute vatin a vatna a damsak ding hi. Amaute TOPA lam ah kihei ding uh a, amah in a thumna uh dawngin a damsak ding hi. ^w

23 Tua ni ciangin Egypt pan Assyria paina lampi khat a om ding hi. Assyria-te Egypt ah pai-in, Egypt-te Assyria ah a pai ding uh hi. Egypt-te le Assyria-te in a bia khawm ding uh hi. 24 Tua ni ciangin leitung ah Egypt-te tawh kibangin Israel-te le Assyria-te zomin a thumna leitung thupha khat ahi ding hi. 25 Thahatpen TOPA in amaute thupha pia dinga, “Ka mi Egypt-te, ka khutsuak Assyria-te ka innluah Israel-te in thupha ngah ta hen,” a ci ding hi.